政情：黃進達記招潮用iPad
康泰旅行社太子爺黃進達（Jason）去年坐正董事總經理，經歷馬尼拉人質事件，連半退休嘅老竇兼幕後老闆黃士心都大讚佢叻仔同成熟唔少。尋日黃士心公開大爆Jason喺八○年出世，年屆三十位高權重，壓力之大，絕非一般人能承受。黃士心仲為囝囝做啦啦隊，叫大家支持佢：「年輕人要支持年輕人！」
講番Jason，原來○三年就入康泰半工讀，由低做起，老竇對佢好嚴格，人工唔高得九千，最多方便佢讀書畀佢返半日，當然唔夠使都有阿媽資助。捱捱吓轉眼喺康泰做咗七年，依家已經畢咗業，舊年升做董事總經理，仲要兼顧社團事務，得閒又上京參加國情班，私人時間無咗一大截，唔好話最愛嘅籃球，連健身都係一個月去得一、兩次。
不過新官上任嘅Jason，積極開拓年輕市場。好似尋日開年度記者會，佢就好潮咁將發言重點放晒入iPad，一路睇一路讀；仲話嚟緊要擴展網上服務，唔止自助遊，連報旅行團都可以留位同信用卡過數，喺網上一take過，果然有年輕人嘅一套。