政情：蔡新榮與「橋」結不解緣
由屯門公路嘅穿山大橋到創下世界紀錄嘅青馬大橋，以至講求邏輯嘅橋牌，即將榮休嘅土木工程拓展署署長蔡新榮，一生與「橋」結下不解緣，喺政府一做就卅二年。返埋今日就正式開始退休前休假嘅蔡新榮透露，七三年畢業後第一份工喺私人顧問公司任職，一入行就有份興建屯門公路，自此對大橋「情根深種」，最自豪係參與青馬大橋工程，回憶時仲一臉緬懷：「當時喺時間緊迫下可如期完工，仲創下咗同類吊橋最長世界紀錄，滿足感好強烈！」
離任在即嘅佢，仍心繫基建，覺得政府因為填料庫爆滿而將建築廢料運往內地好嘥，建議喺北大嶼山等地填海解決房屋問題，佢仲苦口婆心話：「市民唔應該對填海諗得太負面，社會應該多啲討論。」
講到退休後係咪加入私人機構，佢話未有具體計劃，唯獨對橋牌滿腹大計。曾經喺今年名人橋牌邀請賽與「棋聖」聶衞平過招嘅佢坦言：「最想操番橋牌，之前太忙丟低咗十年，只係間中玩吓，希望以後可多啲參賽。」佢興趣多多，又想唱歌同打羽毛球，睇嚟退休後不愁寂寞。