政情：國際網球巨星攜手放午炮
萬眾期待嘅香港網球精英賽2011今日隆重展開，來港參賽嘅四位國際球星，包括世界排名第五嘅美國V威廉絲「大威」、中國「一姐」李娜、法國球手雷絲雅和俄羅斯靚女姬莉蘭歌，尋日獲安排參加豐富節目，其中一項就係到銅鑼灣主持怡和午炮儀式，名副其實為網球賽打響頭炮，並且宣傳呢個香港旅遊景點。
大威高叫High爆
午炮儀式喺中午舉行，由於炮聲巨響太大，眾球星都戴上耳塞，表現得相當興奮，連到場時Cool爆的「大威」，放炮一刻亦不禁放聲大叫，情緒高漲。至於二十三歲嘅俄羅斯美女球手姬莉蘭歌，就話曾經喺其他地方睇過類似活動，但仍然覺得好有趣，仲話會抽時間逛逛香港呢個國際大都會。
香港網球精英賽2011由今日起一連四日喺維多利亞公園網球場舉行，參賽隊伍包括歐洲隊、俄羅斯隊、美洲隊及亞太隊，今日四時半首場係歐洲隊雷絲雅對亞太隊嘅張玲，然後六時後舉行開幕禮，賽事緊湊，大家密切留意喇！