政情：阿壎接手法界議席？

本月尾就六十三歲嘅吳靄儀，早喺○三、○四年已經暗示明示想退休，但一直搵唔到合適嘅接班人。早前傳過嘅人權大律師潘熙、現任公民黨執委郭榮鏗等，唔係太年輕就係唔想放棄本身嘅法律事業。後來幾經辛苦搵到個陳淑莊從政，佢直接跳咗去參加地區直選。搞到泛民最後要諗出一條「絕世屎橋」，游說最初循法律界功能界別出道嘅「漢奸」李柱銘食回頭草，想佢由直選轉番去選法律界，畀人笑到甩牙。

據聞泛民內部已對自行「欽點」法律界接班人感到死心，亦有人認為以前泛民堅守立法會每一個議席，連被指為「小圈子選舉」嘅功能界別都寸土必爭，目的係守住全體三分之一議員嘅政改否決權，但經過二○一二年政改一役之後，呢個「天條」已變得冇乜意義，毋須將法律界失守睇得太重。

律師會會長 無黨無派

泛民自己後繼無人，但又唔想將法律界個位拱手相讓畀建制派，有人就提議抬王桂壎上轎接棒。現任律師會會長王桂壎本身唔屬於任何泛民黨派，過往較少就政治問題表態，一直不被視為泛民一員；不過由於佢做過立法會法律顧問，同好多泛民法律界人士好熟，個個都「阿壎」咁叫佢，即使唔算係自己友都算係老友。

最重要嘅係，律師會喺阿壎掌舵一年多以來，一洗過往嘅親建制形象，多次主動就社會關注嘅政治同民生議題發聲，由政改、趙連海事件、到擴大法律援助資助範圍，立場都同泛民非常接近，有時仲激過近年愈嚟愈建制嘅大律師公會。雖然佢自己講過冇興趣參政，不過有人認為佢只係因為依家做緊律師會會長，先唔方便咁早公開表態，等佢今年五月落任後，可能又會有唔同講法，所以難怪佢會成為泛民物色嘅對象。