中環耳目：鍾志平推介阿一海景飯店
明天更好基金理事鍾志平（Roy）經常同外國政要打交道，講解香港嘅政經形勢，佢梗要密切留意本港政商界嘅動靜，同外國人談天說地先至唔會口窒嘛！咁仲未夠，Roy都好勤力發掘新食肆，事關香港人鍾意講飲講食，佢都要掌握新形勢至得。
至愛豉椒味菜炒肚尖
最近尖沙咀多間新商廈落成，好多新食肆進駐，Roy趁機盡情發揮努力搵食嘅香港精神，幾乎食遍The One、K11同埋iSQUARE嘅大大小小食肆。卓妮問佢有咩好推介，佢首選iSQUARE廿九樓嘅阿一海景飯店，至愛炒得精彩嘅豉椒味菜炒肚尖，盛讚肚尖好爽口，加上絕靚海景，享受一流。
Roy笑稱自己好鍾意食嘢，經常周圍去發掘新食肆，上述三間新商場就留低唔少Roy嘅足迹。佢笑稱：「講到食嘢，冇人夠我叻！」又話香港人鍾意講飲講食，所以佢都要不停發掘新嘢，先至夠人哋講。
講到阿一海景飯店，睇個招牌就知有楊貫一嘅身影，跟隨一哥工作嘅林啟勛係行政總廚，阿一就退居幕後做顧問，所以飯店唔止保持富臨飯店嘅水準，林師傅仲特別設計一系列小炒菜式。