中環出更：呂鈞堯聖誕甜蜜遊台灣
保良局主席呂鈞堯（Quincy）去年九月底娶咗個韓籍靚老婆Miyoung後，啱啱度過婚後第一個聖誕節，甜甜蜜蜜暢遊台灣。為咗令太太有個難忘旅程，Quincy趁十二月初到台灣公幹之便，搜羅台北吃喝玩樂好去處，早前帶太太去夜市觀光、品嘗鼎泰豐小籠包、日本菜等。喺台灣眾多美食之中，佢太太最鍾意食嘅係台灣牛肉麵。
享受完台北甜蜜之旅，Quincy又計劃農曆新年帶太太去新加坡玩幾日，真係恨死隔籬。不過Quincy無忘記一班弱勢社群，事關保良局尋日喺機場一間酒店搞咗個長者懷舊舞會，讓長者一嘗跳舞嘅歡愉及緬懷過去，場地由富豪集團千金羅寶文代表贊助。Quincy稍後又會帶埋太太去探訪長者，善心滿瀉。
婚後日日歎韓式早餐
卓妮問Quincy婚後生活有乜唔同，佢話最大分別係唔使再外出食早餐，每朝都喺屋企享受韓式早餐，例必有白飯同海帶湯，平時應酬多，佢就好好利用早餐時間同太太傾吓偈。
Quincy咁忙，幾時生番個愛情結晶品呢？佢話：「盡快啦！」不過睇怕就算係，都係四月卸任保良局主席之後嘅事。問呂媽媽呂陳慧貞想唔想抱孫，佢就話愈快愈好，生夠一對仔女，湊個「好」字！