中環出更：彤叔三代同堂撐教學酒店開幕

呢個baby分量十足，由新世界集團投資十三億元。彤叔唔係首次「科水」撐中大，但講到搞教學酒店計劃，就係首次。難怪佢興奮如抱孫，穿着黑色Nike波鞋，精神奕奕上台主禮。不過彤叔好低調，冇開腔致辭，全程由純官擔大旗。

純官語重心長咁話，出錢出力辦教學酒店計劃，非為賺錢，而係盡社會企業責任，等學生可以打破案例教學局限，親身參與營運管理。

鄭裕彤教學大樓

沙田凱悅酒店正式開幕，標誌着中大教學酒店邁進新台階。

呢份苦心，中大校董會主席鄭海泉、前中大校長李國章都話好感激，尋日雙雙到賀。中大校長沈祖堯自爆喺○九年酒店開幕時，已靜雞雞幫襯過，當時佢未做中大校長，微服出巡去酒店餐廳食飯，發現牛扒極之正斗。

彤叔（右二）與純官（左二）主持開幕禮；右一為校董會主席鄭海泉，左一為校長沈祖堯。	酒店內設有大泳池，供住客使用。	新世界搞大騷，又點少得彤叔乖孫鄭志明（左）及鄭志雯。

純官料股市牛氣沖天

純官主禮完畢後，不忘為香港樓市把吓脈。佢滋油淡定話，樓市今年繼續向上，預測升幅有十多巴仙，雖然政府早前出招打擊炒風，但佢覺得成效唔大，如果嚟緊嘅需求大於供應，樓市一定會照升。

咁點睇股市呢？純官繼續唱好：「股市都好啫，牛氣沖天！」卓妮問佢囝囝志剛結婚後添丁未？點知純官都係嗰句：「牛氣沖天！」言下之意，莫非囝囝好快做老竇？

講番教學酒店計劃，共分兩部分，包括香港沙田凱悅酒店及命名為鄭裕彤樓嘅教學大樓。中大酒店及旅遊管理學院院長李金漢話，整個計劃由構思到正式啟用，歷時超過十年。

酒店以五星級國際酒店規格管理，設有五百多間客房，為中大酒店及旅遊管理學院學生提供實習機會。而樓高十五層嘅「鄭裕彤樓」，除咗設有多個教室及大講堂外，亦有示範廚房、品酒實驗室，以及由學生經營及管理嘅餐廳，讓學生真正做到，理論與實踐相結合。