中環出更：梁定宇囝囝朗誦賽奪冠
東華三院一月將有兩項大型籌款活動，分別係「東華愛心競技同樂日」同「萬眾一心耀東華」慈善音樂會，尋日兩個活動舉行記招，身為東華主席嘅梁定宇當然要出席呼籲。每個東華主席在任期間，都要全身投入，梁定宇當然唔例外，今年佢都無咩時間做番本行，不過做主席只係做三百六十五日，做生意就係一輩子，梁定宇毫無怨言。
年僅五歲獲郎朗讚賞
當然，生意可以暫時放低，阿仔就點忙都要抽時間陪。上星期六佢就陪五歲囝囝晉熙去參加朗誦比賽，結果聲音雄厚嘅晉熙無令爸爸失望，攞咗個冠軍。梁定宇太太喺內地開設英文教育中心，晉熙嘅教育方向，就由梁太全力負責。五歲嘅晉熙除咗口齒伶俐，游水鋼琴都難佢唔到，連鋼琴大師郎朗都讚佢天分高，認真文武全才。
至於身為爸爸嘅梁定宇，主要係同囝囝玩，除咗踩單車，前日佢先同晉熙兩仔爺去行山睇馬騮。不過佢笑言雖然自己主力同囝囝玩，但如果兩夫妻同囝囝一齊三人行嘅話，晉熙就始終都係親媽咪多啲。咦﹗聽落好似有啲酸溜溜喎。