中環出更：洪為民開P撐社企叫到會

四十二歲生日嘅Witman，元旦日包起灣仔一間酒吧，請咗百幾位各界好友陪佢吹蠟燭。Witman係下屆菁英會主席熱門人選，瓣數多多，菁英會主席白富鴻、副主席楊華勇、盧金榮及香港青聯副主席鄭重科等齊到賀，名人二代如趙式浩、邱詠麒等都嚟賀喜，連喺公務上常有接觸嘅立法會議員陳茂波、譚偉豪以及佢喺I.T.界嘅朋友都現身撐場。

逾百好友 陪吹蠟燭

久違了嘅前十大傑青王津都嚟埋，見佢中氣十足，風采不減當年。王津當日下午參加完童軍100周年大露營，晚上到Party趕下場，精力旺盛，卓妮都要寫個「服」字。

派對上仲有一位稀客，就係浸大工商管理學院院長張仁良，仲係一家三口齊齊嚟，認真畀面；張仁良係「夥伴倡自強」諮委會主席，Witman係委員，大家合作無間。原來張太係法國人，囝囝張蒲劍（Lucien）有着混血兒嘅優良特質，眼大鼻高。張蒲劍喺英國University of Bristol修讀經濟與管理，讀埋今年畢業，老竇係經濟金融專家，唔知囝囝會否繼承衣鉢？張太一樣了得，廣東話同普通話一樣講得流利，閒來到匡智會做義工，認真有愛心！

Witman開P不忘回饋社會，幫襯社企新生餐廳柯打到會，美食源源不絕供應，由元旦夜食到翌日凌晨四點。盡情happy有原因，Witman聖誕前出發去英國，再轉機遊意大利，乘搭英航諗住冇甩拖，點知抵達英國時，發現遺失其中一件行李，其他團友都中招，好彩Witman有衫喺行李篋，否則天寒地凍冇衫着，咪話唔掃興。返到香港，還是覺得香港最好，梗要乾杯慶祝吓！

左起：林智彬、王耀瑩、白富鴻、王津、甄韋喬等一班兄弟都嚟飲番杯。	左起：趙式浩、李昉蓉、何玉慧、傅明憲及潘美婷齊齊投入歡樂氣氛中。	吳傑莊（左）與太太（右）齊到賀，壽星仔洪為民親自招呼。
張仁良（左）與囝囝張蒲劍（中）及太太一家三口嚟湊熱鬧。	邱德根孫女邱詠麒（左三）同姊妹密斟。左起：Yvonne Kung、周沁、邱詠麒、趙慧怡、吳春秀及張菁菁。

卓妮