探射燈：劉建文藝術人生踩鋼線
劉建文你未必認識，但劉米高你又會好像有點印象，說出他的洋名Michael Lau，再看他一身潮人打扮加上一臉鬍子，沒錯，他就是以十二吋Figure起家，由香港紅到去外國，登上《時代》周刊的土炮設計師。劉建文表示要做到商業與藝術並存，就如馬戲團內踩鋼線的特技人一樣，只得極為狹窄的空間。
和你我一樣，劉建文的故事都是由「打工仔」開始。第一份工負責修補油畫，之後任職設計公司、出版社，再到百貨公司裝飾櫥窗，最後一份工在廣告公司。以上的履歷為劉建文練出一身好功夫，「做G要承受老細嘅壓力，等你唔好以為自己好巴閉！」
劉憶述，當時的工作狀況只得「輸入」，毋須思考，又怎會得到滿足﹖自小愛流連博物館、畫廊的他，畫得一手好畫，更分別於九三及九六年自資開畫展，當時更碌盡人情卡。「青春就係有趣囉，一班人事前唔會理結果或會否成功就去做，點知又做到喎﹗」年輕時的單純、沒有計算，總令人回味。
一周做數十隻 自覺驚人
劉在經濟不景氣時，脫離「打工仔」行列，由畫畫轉型主打做Figure。但一日只得廿四小時，他既要做散件設計兼職，又要限時做出九十九隻Figure。「係好奇怪㗎，都唔知點解嗰陣可以做到咁多嘢㗎。」展覽前一個星期還欠數十隻Figure，不知自己何以能於展覽當天順利完成所有製作，趕及死線。
外人來看，Figure和畫，猶如兩個不同的派別，不過局內人卻另有見解。「兩樣嘢其實一樣，畫就係單一平面，Figure就係三百六十張平面。」製造Figure，劉建文從不假手於人或電腦，從起草圖到落刀雕刻，都由自己一手包辦。「如果喺呢個年代，我睬你都傻啦，依家無人再嘥時間做呢啲無聊嘢㗎啦，科技嘅進步，人唔能夠抗拒。」
憑着一雙巧手，走進人流最旺的商場開展覽，引來人龍排隊看展覽，一下子成為潮人朝拜熱點。劉直指香港以消費主義掛帥，要維持人氣，就要有產品同場出售。記者即時問他：「名氣真的有很大幫助嗎﹖」「名氣？做出嚟嘅啫，唔好信呢啲嘢！哈哈，名氣極都要有趣味先得嘅，因為始終係喺現場，要自己親身感受嘛﹗有趣、名氣，咪喺時代廣場開展覽囉。」趣味同時，劉在製作上亦要求一絲不苟，「不能貪成本平，夾硬做啲平嘢出嚟嘛。」
「商業做得好就可以賺錢，藝術做得好就可以出名。」既有「錢」途，又夠人氣，但在劉建文心目中，他的身份到底是藝術家、還是設計師？「記得劉建文咪得囉﹗」他很誠實：「我樣樣都有啲，又好似懶係藝術，又鬼咁掠水，但你唔商業，好多嘢都搞唔到，我一開始就踩鋼線㗎啦，藝術同商業之間講一世都講唔通，而我已經喺呢條鋼線上踩咗好多年。」
Figure「入藥」 醫都市人心靈
除了藝術家、設計師，眼看粉絲三五成群結為朋友，劉建文更以醫生自居，用Figure「入藥」，治療都市人心靈。「衰啲講句（Figure）其實係一舊爛鬼膠，攬住錫兩啖又無意思嘅，玩又唔會玩嘅，不過擁有佢哋（Figure）嗰一段日子舒服咪夠囉。」
劉建文在潮界點膠成金，不過他卻不甘只為消費主義服務，反而想爭取更多的創作空間做藝術。「最根本嗰樣嘢我都係想搞藝術㗎嘛，依家（事業）OK嘅時候，我就想件事完美啲，如果做展覽或者一些製作，最緊要可以表達多啲，做得深入少少……」
圖：甘偉倫／文：張美琪