政情：袋巾傑唔驚愛女信錯人
「維園阿哥」任亮憲涉嫌強姦及非禮案，揭露部分八十後、九十後政圈男女對性同愛嘅開放態度，一唔小心就好易行差踏錯。公民黨候任黨魁梁家傑嘅九十後囡囡亦都對政治好有興趣，依家喺英國劍橋大學讀緊政治學學士，將來隨時會追隨爸爸踏入政壇。問佢會唔會因應任亮憲事件特別提點吓女兒，袋巾傑就話囡囡一向好乖好識諗，完全冇咁嘅需要。
袋巾傑囡囡來年就會畢業，有意繼續進修，但會先做一、兩年嘢攞啲社會經驗，未決定會返香港定留喺英國搵工。袋巾傑話女兒暫時未諗定做乜，但早前佢獲當地一間通訊社請做實習，遠赴聯合國採訪，覺得非常有趣同有意義，話唔定畢業後會做番傳媒呢行。
早前歐洲刮起大風雪，累到好多留學英國嘅港人子女返唔到香港，不過袋巾傑喺英國嘅囡囡同一對孖仔，就因為好彩早咗返嚟而冇受影響，會陪爸爸媽媽過埋新年先走。