政情：葉劉最難忘 被圍困車廂
立法會將於本年中搬往添馬艦新大樓，多名現任或前任議員近日都大談現有立會大樓嘅難忘往事，包括喺會議廳通宵開會、喺露台抗議示威等。不過對於啱啱「升呢」做新民黨主席嘅立法會議員葉劉淑儀，現大樓最令佢難忘嘅竟然係個停車場。
葉劉講緊嘅，唔係上個月佢架車喺立會停車場連撼四部車嘅瘀事，而係○二年佢仲做緊保安局局長時，喺立會停車場突然被過百個爭取居港權人士重重包圍，近一小時動彈不得嘅情景。雖然經過去年高鐵抗爭，大家依家對呢類型群眾運動已見怪不怪，但當年高官畀人圍，真係前所未見，難怪葉劉到依家都記住。
葉劉架車當年畀示威者打凹車身同砸爛車頭側鏡，不過佢仲可以施施然喺車入面睇雜誌，成為一時佳話。葉劉笑言，當年個司機阿榮喺圍車事件後冇耐，就升職轉咗幫政務司司長揸車，唔知今次佢個司機連炒四車後，會唔會又好快離佢而去呢？