政情：阿人諗接班 搞工政分家
喺職工盟做咗十四年總幹事嘅娥姐鄧燕娥，舊年尾突然劈炮唔撈。娥姐老公、職工盟立法會議員李卓人尋日喺電台節目代太太剖白，話此舉純粹係方便工盟接班，然後仲點咗首充滿抗爭味道嘅《抗戰二十年》畀太太聽，都算係另類浪漫。
做咗十幾年議員嘅阿人又透露，其實佢自己亦諗過接班問題，其中一個方向係將工盟嘅工會同參政角色分家，正式籌組工黨培育新人參政。佢透露工盟內部現已展開討論，但暫時都仲係好初步，又指最大問題係經費來源，因為工盟本身嘅財政情況已經唔係好豐裕，加屬會同工友會費肯定會惹來反彈，令佢相當頭痕。
其實香港過去亦有唔少工會人士諗過籌組工黨，遠嘅有當年仲喺民主黨嘅前職工盟主席劉千石，近啲有上屆立法會嘅工聯會議員鄺志堅，以至早前退出咗公民黨嘅前立會議員張超雄等，不過佢哋統統最後都唔成事。今次阿人係純粹吹吓水定係真正有心組黨，大家拭目以待啦！