政情：陳晴製月曆 攬寵物遮肚
好多公營機構、工商企業、以至政團議員，都喜歡自製月曆，送畀市民、客戶同傳媒用，希望起到宣傳作用，但真正有特色嘅其實唔係好多，前港澳辦副主任陳佐洱女兒、海洋公園保育基金主席陳晴（Judy）製作嘅精美座枱月曆，就令人覺得好有誠意。月曆以搶眼嘅紅白色配搭，封面印有佢同寵物小狗互相對望嘅相片，感覺好溫暖。
月曆內多個月份，都係以Judy本人或者同寵物狗仔嘅合照做主題，個別月份仲出現佢最心愛嘅大熊貓添，除咗一月同四月，個個月份都可以見到佢嘅靚樣。月曆底座以精美盒裝設計，內裏載有一疊備忘紙張，而每月月曆背面仲印有中國農曆對照及「宜忌」資料，非常實用。
懷有身孕嘅Judy月前見佢已經腹大便便，唔知係咪咁，月曆內好多幅相，都見Judy攬到啲寵物實一實，完全睇唔到個肚。不過，其中一幅相就睇到佢豐滿咗好多，呈現「包包臉」，顯露出孕婦特徵。Judy曾透露預產期喺上月底，話唔定依家佢已經生咗都未定，相信好快就會傳出喜訊。