政情：建制派吹雞抬譚耀宗上轎
立法會去年順利通過二○一二年政改方案，不過魔鬼在細節，政改本地立法嘅問題相信仲有排拗。負責審議本地立法嘅立法會委員會，至今竟然有多達卅一名議員報名，即過半數議員都會加入，其中有二十人來自建制派，幾乎係泛民主派委員數目嘅兩倍。建制派上次角逐《競爭條例草案》委員會副主席時，大意失荊州輸咗畀泛民，今次佢哋超額冧友報名，相信係唔想重蹈上次競爭法一役嘅覆轍。
政改本地立法審議委員會，議員報名限期剛於大除夕晚結束。截至當日中午，廿三名泛民議員當中有啱啱唔夠一半報咗名，其中民主黨同公民黨分別派出四人、仲有民協馮檢基、公民起動何秀蘭同獨立議員鄭家富。
向來對政改意見多多嘅社民連三子，今次一個都冇報名，原因並唔係佢哋受到黨員任亮憲嘅醜聞困擾，唔得閒處理政改，而係佢哋根本全盤否定政改方案，故決定集體杯葛今次本地立法。不過無論原因係乜都好，社民連三子杯葛，肯定有利會議會暢順進行，變相向港府送上一份新年大禮。
五個建制派政團自由黨、工聯會、經濟動力、專業會議同埋「五散人」，各自出動至少一半成員入會，反而民建聯就只係得主席譚耀宗同葉國謙兩人報咗名。不過草案委員會十成十會由該黨主席譚耀宗出任，最惡頂嘅位都畀佢啃咗，自然唔使派咁多人入會。立法會之前審議政改方案決議案，都係由譚Sir做主席，佢嘅老油條加冷面笑匠式嘅主持會議作風，即使社民連三子在席都未驚過，更何況佢哋唔在場呢？
怕重蹈競爭法覆轍
記得去年經濟動力嘅梁君彥以高票當選競爭法委員會主席後，大家都理所當然咁以為，角逐副主席嘅民建聯陳鑑林（橄欖）肯定亦可順利當選，但點知最後有部分建制派臨陣失蹤甚至倒戈，令橄欖最後經抽籤輸咗畀泛民。今次本地立法關乎香港政制發展嘅大是大非，中央同特區政府都極度關注，建制派自然不容有失，因而瘋狂派人報名入會，除咗齊齊為譚Sir抬轎，確保佢可以順利當選主席外，連副主席個位都唔可以畀泛民偷到雞！
我哋問過主席熱門人選譚Sir，佢耍太極話可能政改問題具爭議性，先至有咁多人報名加入喎！對於係咪會角逐主席，佢無斷然否定，仲話若果其他議員支持佢都肯做嘅，答案呼之欲出。