中環出更：好友拉頭馬 李文斌沾旺氣

由於華商會挑戰盃係每年元旦嘅盛事，黃守正夫婦好似主人家咁幫手頒發獎盃，今年隻盃由短途新星「小橋流水」奪得。黃守正話，華商會挑戰盃總獎金高達二百三十萬元，全數由馬會支付，反映馬會對華商會相當重視。今年係辛亥革命一百周年，孫中山先生當年都出入過華商會，問黃守正會否搞紀念活動，佢就話唔會大搞，但會嘗試搵番啲年老長者口述當年歷史。

尋日除咗華商會挑戰盃外，王國強（KK）所屬嘅九龍城工商業聯會有匹新馬「龍城動力」首次出賽，KK都係馬主之一，所以睇得相當肉緊，企喺佢身旁嘅韋國洪都緊張埋一份，可惜匹馬最終只係跑第七，無緣拉頭馬。與KK同一命運嘅仲有Raymond，其愛駒「包裝選擇」又係三甲不入，原本佢胞弟Edmond諗住有得拉頭馬，結果好夢成空。

不過，Edmond元旦就出門遇貴人，有兩個好朋友帶挈佢拉頭馬。第二場冠軍馬「軍士」係匹團體馬，其中一個馬主東華三院總理趙怡係Edmond嘅朋友，所以獲邀一齊拉頭馬影相留念。另外一匹奪冠嘅「友運行」，其中一位馬主吳守基又係佢嘅朋友，令佢可以再次落場拉頭馬。問Edmond有乜新年願望，佢話近期國際局勢混亂，所以希望今年世界和平喎！

李文俊（左）嘅愛駒出賽，李文斌梗係要入場支持。	夏佳理精神奕奕向卓妮打招呼。	任志剛（右）離開金管局後風采依然，尋日拖埋太太入馬場湊熱鬧。（徐家浩攝）
黃守正夫婦（右一、二）頒發華商會挑戰盃予「小橋流水」馬主高金沛（左二）。	王國強（中）為自己有份嘅新馬首次出賽打氣，在旁嘅韋國洪（左）亦相當緊張。

李文俊話未畀爸爸讚過

至於大哥Raymond又有乜新年願望呢？佢坦言去年好多嘢都做得唔好，希望今年再做好啲。其實Raymond都唔使咁謙虛吖，佢爸爸李運強都公開讚過佢打理公司業務頭頭是道，Raymond就好開心話：「係咩，阿爸從來唔會喺面前讚我喎！」可能為人父母唔想讚壞啲仔女啩！

卓妮