炮彈鐵騎士撼柱亡
元旦狂歡樂極生悲。廿六歲鐵騎士前晚約同大批電單車發燒友除夕夜倒數後，組成車隊遊車河繼續慶祝，昨凌晨途經西貢大坳門路一個「死亡彎角」時，他疑高速入彎失控狂撞路壆，鐵騎士頓變「炮彈飛人」撞向燈柱重傷，送院不治，成為元旦首宗奪命車禍。其母路祭時哭問蒼天：「新年流流點會搞成咁？」
死者姓鍾，在薄餅店任職外賣員，人稱「阿仁」，獨居大埔富亨邨亨泰樓，酷愛揸電單車，考獲車牌約兩年。而肇事電單車改裝成「大包圍」的辣車。
前晚除夕夜，阿仁相約大批電單車發燒友到土瓜灣一食店晚膳，其後移師大角咀銀海一號對開海旁觀賞元旦倒數煙花，期間有人建議：「走轉大清（清水灣）。」阿仁與另七人駕駛電單車遂浩浩蕩蕩駛往清水灣遊車河。
昨凌晨二時許，車隊風馳電掣沿大坳門路落斜，阿仁駛在最前，途至二灘附近一個左彎時，電單車突失控，撞向左邊行人路石壆，繼而人車分離，他飛彈三米外狂撼向燈柱，再撻落地重傷昏迷，電單車復滑前數十米翻側。
同行車友駛至見發生意外即停車救人及報警，救護員趕抵發現傷者雙眼反白，已無呼吸及脈搏，送院搶救，惜告身亡。現場留下長長的電單車磨地痕迹，警方不排除肇事電單車當時車速頗高，轉彎失控肇禍，並呼籲目擊者提供資料。
揸辣車不喜被爬頭
死者雙親與親友趕到醫院驚聞死訊，悲傷不已。在場協助警方調查的車友聞噩耗亦黯然哀痛，有人點起三支香煙向死者魂斷處拜祭：「返嚟喇，返嚟喇！」一名車友指，平時相約友人遊車河時曾見過阿仁，但並不相熟，其後得知其不治感難過。另一同行車友憶述，阿仁當時掟彎時，似無意識轉彎，直撼路壆，他透露：「阿仁手車幾辣，唔喜歡畀人爬頭。」
亦有友人網上留言致哀：「佢份人咁好，點解會係佢，佢都無做壞事，點解會係佢？」「我到依家都唔係好相信呢個係事實，但係事實係無得改變。」