「維園阿哥」任亮憲嘅桃色風暴席捲整個政壇，唔單止各黨「黨花」人人自危，事件更加令人覺得新一代嘅年輕政客私生活方面唔係咁檢點。
一批年輕白鴿黨員喺上月正式成立「民主青年」，黨元老司徒華喺醫院接受癌症治療，都不忘訓示佢哋要「紮紮實實」，莫非怕一班血氣方剛嘅青年會不慎步人後塵搞出桃色事件？
民主青年主席莫兆麟尋日同傳媒茶敍，大爆自己喺上星期五到醫院探華叔時被佢「訓示」。
佢話華叔對民主青年嘅成立感到好欣慰，但同時提醒佢哋要「紮紮實實」、「唔好好高騖遠」，似乎意有所指。莫兆麟直言，任亮憲事件爆出之後，黨嘅高層冇向佢哋作出任何「提醒」，但笑言佢哋一向好踏實，唔會出事喎。
無辜捲入任亮憲醜聞嘅「民主黨小百合」鄭莉莉，原來都係民主青年成員之一，但佢尋日就唔見人，唔知係咪有心避席。佢嘅黨友就爆佢去咗旅行，仲話佢雖然受緋聞所累，但心情冇受到困擾喎。