政情：阿人兩公婆 淡出職工盟
本港三大工會之一嘅職工盟出現高層人事變動，做咗職工盟總幹事十四年嘅李卓人老婆鄧燕娥前排突然辭職，搞到職工盟第一次要登廣告招聘總幹事，加上身兼秘書長嘅李卓人又忙於立法會事務，夫妻齊齊淡出。
娥姐話自己八二年讀完書就投身勞工界，自九六年接阿人班做咗總幹事咁耐覺得好困身，好幾年都無放過長假，所以想全身而退，趁退休前試下其他新挑戰，例如涉及國際勞工問題嘅嘢，或者做吓散工。阿人就話支持老婆嘅決定，等娥姐可以抖下。
今次係職工盟首次公開招聘總幹事，後日就截止，內部專登成立咗個五人遴選委員會負責揀蟀，其中一名成員李建賢話，至今收到五個申請，佢話呢個位工作都好繁重，對內要照顧幾十個屬會，對外又要同國際或內地工會交流，佢希望有多啲人申請，委員會都定咗套評分標準，希望一月揀到合適人選啦。