政情：Rita劉借奶茶過橋硬銷科研
港式奶茶風行世界，成為最能夠代表香港嘅飲品之一，商務及經濟發展局局長劉吳惠蘭（Rita）早前就同今屆金茶王羅德有個奶茶約會。喺剛過去嘅聖誕節前，佢邀請咗幾位小科學家一齊赴約，順便歎吓金茶王嘅秘製奶茶。席間Rita打蛇隨棍上，借奶茶軟銷香港品牌、科技發展同力撐六大產業，呢杯奶茶真係物有所值。
小小科學家多諗頭
Rita請咗科大星之子陳易希、今年嘅「明天小小科學家獎勵計劃」一等獎得主聖保祿學校中七生楊穎琪、喺協恩中學讀中五時獲同一計劃三等獎嘅連珮珩、以及利用藍綠藻厭氧光合作用提供光合氫發電嘅迦密柏雨中七生陳凱誼等，一齊去飲奶茶，歎完金茶王沖製嘅奶茶後，一眾小科學家都忽然有橋，想發明啲同奶茶有關嘅嘢，譬如沖奶茶機、利用沖完奶茶嘅茶葉嚟發電等。
Rita又借奶茶大談香港品牌同科技發展，話港人每年飲十億杯奶茶，數量非常驚人，近年港式奶茶仲衝出世界，證明本港歷代茶師傅嘅努力同心機得到認同。佢好樂於向來港遊客推介奶茶，並希望科研新一代從奶茶創製嘅過程，領會無數嘗試與堅持係科研工作不可或缺嘅精神，得到鼓勵同啟發。