政情：辦世界盃港府諗壞腦

有建制派立法會議員透露，港府申亞嘅拉票攻勢，臨近聖誕前已全面煞停，代表港府不再存有幻想，之不過，申亞大龍鳳照樣會足版上演，明知要求民建聯轉軚無望，無法湊夠支持票都好，依然極有可能喺農曆新年之後，向立法會財務委員會提出申請撥款，由議員否決，讓申亞計劃「自然死亡」，算係正式為事件畫上句號。

「德成局長」曾德成申亞夢碎，不過港府中有人認為，申亞搞唔成無所謂，搞世界盃又得唔得呢？申辦世界盃以國家為單位，如果香港要搞，即以中國名義申辦，實際籌辦嘅主角係香港同珠三角城市。嘩，一場申亞美夢，令香港精英運動員磨拳擦掌，如果舉辦世界盃，全港球迷舉腳贊成，淨係講吓都令人好亢奮喇。

球場配套欠奉 不切實際

不過實際情況係，舉辦世界盃，至少要有十二個標準足球場，其中舉辦大賽嘅球場要能容納八萬名入場球迷，其他分組賽球場亦須容納四萬人，香港大球場啱啱夠資格靠邊站辦分組賽。仲有，卡塔爾為辦世盃，預算耗資六百億元……美元呀，若以此數計算，香港就算同其他泛珠城市攤分承擔，都要盛惠八百億元，舉辦世盃呢頂帽，香港係咪戴得落，真係要計清楚。

二○一八年同二二年嘅世界盃舉辦權已經塵埃落定，分別由俄羅斯同卡塔爾奪得，按不成文慣例，世界盃唔會連續兩屆喺同一個洲舉行，所以，香港最有機會申辦二○三○年世界盃，雖然遙遠咗啲，但以港府一向議而不決、決而不行嘅作風，講得嚟差唔多。

二○三○年即係二十年後，香港係點樣嘅境況呢？聞說到時香港嘅基建已經好見得人，西九藝術文化區鴻圖初展，泛珠三角嘅跨界基建四通八達，港珠澳大橋打通交通任督二脈，搞一屆世界盃，泛珠生猛晒。特區政府嘅體育強城夢愈發愈大，不過冇咁大個頭唔好戴咁大頂帽，咁顯淺嘅道理都唔明？特區嘅管治都搞到一鑊泡，民心又唔團結，搞全球矚目嘅盛事，盞出醜於國際舞台咋喎。