中環耳目：電波計時錶成孫秉樞「新歡」
鐘錶大王孫秉樞見盡靚錶無數，近期新寵係面世只有三個多月嘅星辰電波計時錶（Citizen Eco-Drive Enamel Radio Controlled），佢尋日戴埋「新歡」，亮相卓能主席趙世曾搞嘅活動。
風流嘅趙世曾唔止同女人有緣，對男士一樣長情。孫秉樞就自爆識咗趙世曾逾四十年，四年前做埋卓能集團非執董，趙家有騷，佢都去打氣，仲戴上由佢代理嘅星辰新錶助興，隻錶別具賣點，孫生介紹話，白色錶殼部分採用搪瓷製造，質料堅硬，加埋光動能設計，就冇需換電池咁煩。
不過最盞鬼之處，莫過於由電波幫你調校隻錶，每晚凌晨兩點至四點，手錶會接收由中國西安附近電塔發出嘅電波，將手錶誤差時間撥正，真正做到零誤差。錶價盛惠二萬六千港元，限量發售二百五十隻，據聞一推出就已經畀錶迷搶購，孫秉樞手快預留一隻畀自己，都算醒目。