中環出更：陳國民巡工展攤位顯廚藝
正所謂唔辛苦邊得世間財，就算做老闆都一樣要親力親為，好似德國寶話事人陳國民（Edward）咁，尋日就見佢企喺工展會個攤位做Roadshow，親身向顧客示範點樣整雞扒燒肉。Edward話佢自己做顧客行街，最怕就係聽到啲言過其實嘅路演示範，所以佢對自己嘅員工要求好高，一得閒都會嚟聽吓佢哋點演繹。尋日佢咁啱行過，見到顧客咁捧場，所以想親手整啲嘢食回饋吓顧客，順便教佢哋點煮，分享吓入廚樂。
Edward平時都好鍾意煮嘢食，不過又無咩時間親自下廚，所以佢特登喺公司整咗一間房用嚟做私房菜，一得閒就會叫齊班兄弟上去食飯聯誼下，仲請咗兩個大廚坐鎮，自己又可以煮吓畀吓意見，好似炆鮑魚咁，佢仲有獨門心得，水準拍得住大師傅。
講番佢哋個攤位，Edward話佢哋每年都做到八位數字營業額，不過單單係裝修個攤位都用咗七位數字，差唔多起咗間舖咁滯，所以佢笑言只係好微利，但係宣傳價值就好高，因為每年人流都好好，可以畀顧客知道有咩新貨。