政情：李周美枝難忘困機艙
女童軍總會首次要「爭莊」嘅香港總監選舉已進入白熱化階段，明年一月八日進行投票選出真命天子。據聞兩位候選人、國際事務總監李周美枝同副總監彭徐美雲近日忙於展開游說工作。
尋日喺尖沙咀撞到李太，佢話冇幾耐前先獲委任做女童軍總會國際事務總監，任期至明年四月，工作都幾繁重㗎，尋日只係忙裏偷閒，趁聖誕節買吓禮物。難得見到李太，梗係要問佢嘅選情如何啦！李太就話，自己喺女童軍已經廿幾年，選唔選到總監其實冇乜所謂，個會好就得喇。
做咗廿幾年，咁有咩難忘經歷呀？李太憶述十年前同一班女童軍總會管理層帶幾百名女童軍去北京，點知中途天氣惡劣，被迫喺天津機場降落。
降落時機場職員竟然收晒工，佢哋一方面要安撫班小朋友，另方面要為大家張羅食物，最後一班領隊竟然要自己去搵機上嘅食物分發畀班團員，大家被迫喺機上等足六、七個鐘。咁辛苦，難怪李太咁難忘啦！