路邊大量竹枝無人理
楊先生日前路經青衣邨一帶時，發現行人路有大量竹枝被棄，逾兩星期仍未清理，質疑政府部門巡查不力，「普通人亂丟垃圾都要罰千五，有乜理由丟建築廢料無人理？」
「明明立咗例要揼去堆填區，就因為啲人唔想畀錢就轉嫁畀其他市民，政府又唔以身作則嚴厲執法，點樣令市民信服？」葵青區議會副主席麥美娟認為，建築廢物處置收費計劃已實施經年，惟環保署巡查及執法仍「懶懶閒」，令建築廢料任意棄置亦乏人跟進，要求政府正視問題，「唔好一味將責任推畀市民！」環保署證實，上址有建築廢料被遺棄，職員巡查期間並未發現源頭，或有人非法棄置，故未能採取進一步行動，但已通知相關部門處理。