鬍鬚曾話自己唔係「視帝」，唔通佢覺得自己係魔術師？年年財政預算呃盡港人，有會計師行幫佢計過數，今個財政年度盈餘應該會介乎六百二十一億至七百零一億元，遠勝政府原本預計嘅二百五十二億元赤字，換言之，正負相差成千億！「如果你係我，你會點制訂下年度嘅財政預算案呢？」仲使問阿貴，開倉派現金，還富於民喇！
鬍鬚曾，你直情係「影帝」，講真，如果你揸住煙啤頭，問：堅定流？老朽一定話：堅！皆因你集「視帝」、「影帝」於一身，再學得魔法幻影，真亦假，假亦真，赤字變盈餘，豆腐變黃金，點到你唔服？
鬍鬚曾，你嘅「留意見唔一定要留鬚」遊戲，據講害咗同樣蓄有二撇雞嘅孫公，呢輪佢畀直資學校嘅混帳問題搞到吹鬚碌眼，一顆春心煩到死，仲因為你一生愛上鏡，害咗孫公無端畀班雷曼苦主鬧，佢哋去政府總部請願，一見有二撇雞嘅孫公經過，以為係鬍鬚曾，狂呼：「雷曼事件未解決呀！」
魯迅有句打油詩：作法不自斃，悠然過四十。這是魯迅嘲諷錢玄同的戲作，因錢玄同早年有名言：四十歲以上的人都應該槍斃。可他早已年過四十，還優哉的在北大做大教授。
「作法自斃」典出《史記‧商君傳》。商鞅規定沒有證明的旅客要治罪，結果他自己要投宿時卻沒有證明，店家要依法懲之，商鞅喟然嘆曰：嗟乎！為法之敝，一至此哉！魯迅巧改成「作法不自斃」，亦妙矣。鬍鬚曾年年計錯數，一樣作法不自斃，命好也。