政情：張學明生蛇難入眠
之前有傳鄉議局副主席兼民建聯立法會議員張學明九月通完波仔後身體好弱，早排仲突然暈倒添。張學明尋日出席泰亨鄉太平清醮活動後話，其實佢係因為「生蛇」令到夜晚瞓得唔好，先會頭暈暈跌倒。
張學明話，九月時心臟唔舒服，檢查後發現兩條血管塞咗，所以即刻入院做通波仔手術，依家慢慢康復緊，定期檢查時醫生仲話進展情況良好添。至於早排之所以突然暈倒，佢就解釋因為感染咗俗稱「生蛇」嘅過濾性病毒，生蛇地方好痛，成晚瞓唔到，終於頭暈跌親。「生蛇」其實係俗稱，當身體虛弱時病毒就會發作，變成帶狀疱疹，沿神經線喺皮膚上顯現，好似條蛇咁。
既然仲係康復階段，咁會唔會影響佢做地區工作呀？張學明笑笑口話，地區工作一定有繼續做，好似尋日咁咪又係繼續代表鄉議局落區參加活動囉！不過佢亦承認，因為家族遺傳問題令血脂偏高，依家飲食小心咗好多。