政情：陳祖澤開齋拉頭馬
正在享受退休生活嘅陳祖澤（John），做咗馬會主席幾年，到今年七月卸任前先至得償所願開齋拉頭馬，為主席生涯畫上完美句號。早前阿John講笑話希望退落嚟之後，養馬運會好啲，結果承自己貴言，其愛駒「好運得福」前晚喺快活谷天寒地凍兼落雨嘅環境下冷手執個熱煎堆跑第一，仲以半個身位跑贏咗醫管局主席胡定旭嘅愛駒「心路」。
今次係阿John今季首次贏頭馬，喜獲獎金三十六萬元，真係人如愛駒大名咁好運得福，所以前晚佢相當風騷，拖住太太一齊落場拉頭馬。阿John笑笑口話，會將筆獎金當做聖誕節禮物，至於會否當禮物轉贈老婆，咁就唔知喇！原來前晚阿John喜獲一位九龍華仁書院師兄捧場，但因為落雨關係，阿John話唔敢叫師兄落注，但佢師兄最後都投注五十元位置以示支持。
講番肥胡因為愛駒「心路」輸咗半個身位，無緣拉頭馬，以肥胡平日為愛駒打氣嘅表現，失望在所難免，但前晚又唔多覺眼見到佢到場，所以仲未問到佢心情如何。