政情：醫管局會議廳河蟹化
尋日醫管局開大會，個會有兩個第一次。尋日係醫管局新任行政總裁梁栢賢第一次以CEO身份開會，加上係醫管局會議廳經過長達一年裝修後第一次開大會，所以顯得特別有意義。
會議廳裝修後最大唔同之處，就係一改以往典型英式議會嘅格局，改為較平易近人嘅會議廳模式，即係話所有與會人士都平起平坐，即使係主席都唔會高人一等。除咗成個設計改晒之外，成員嘅座位前仲加咗好多新式嘅會議設備，好似表示發言先後嘅訊號燈、電視屏幕、投票同咪高峰嘅按鈕等。為咗令各位大會成員熟悉環境，職員喺開會前都花咗幾分鐘時間教大家用新嘢。
其中一名醫管局大會成員李國麟就話，成個會議廳嘅設計冇咗主席高高在上嘅感覺，令人覺得好舒服，佢自己好滿意，而且由於佢本身係立法會議員，所以對嗰啲會議設備都好熟悉，一啲都難佢唔到。不過唔係個個都對新會議廳咁滿意，好似另一成員霍泰輝就認為舊嘅會議廳靚啲嘞。