政情：田北辰唔慣做阿二

新民黨領導層前晚甫誕生，曾任保安局局長、○八年單人匹馬透過揮軍港島而當選立法會議員嘅葉劉，尋日即率領田二少、史泰祖同曾任前高官嘅行政總裁余衍深見記者，兩名副主席分坐兩側，主次分明。新黨初立，葉劉揚威，為黨定位，指新民黨背後無大孖沙做水喉，自己同疑似特首候選人連朋友都講唔上，新民黨奉行中立溫和。不過，烈女主席拍住不甘後人嘅副主席，女主人亦只能做一半主角，飯局焦點一半時間都落喺田二少身上，而且，田二少嘅姿態絕對唔當自己係阿二。

好似記者問新民黨有乜新橋搶直選票源，田二少主動搶答，指選民投票主要睇人，唔係睇政綱，又率先透露新黨選戰策略，指新民黨嘅搶票目標，係嗰班登記咗做選民而又從未出來投票嘅五成票源，唔知嘅仲以為佢先至係新民黨主席。

對功能組別意見分歧

其後嘅兩小時答問中，田二少多次就新黨路線同發展問題侃侃而談，滿腹大計，發言時間就算無多過身為主席嘅葉劉，亦都絕對可以講係平分秋色，平起平坐，而且，言語間仲不時同葉劉擦出佢哋所謂嘅「正面火花」添。葉劉座上批評功能組別無認受性，新民黨無興趣競逐，語音未落，田二少又插嘴搶答，話功能組別唔係制度嘅問題，而係睇當選者嘅政治理念係好定壞，即係主席發言，呢位副主席不諱言無全面認同。

田二少做開老闆，慣咗同下屬講嘢無所顧忌，葉劉可能早知呢點，尋日田二少講嘢，佢就保持微笑，做番一陣「小女人」，而田二少講過唔怕做嘅「阿二」角色，似乎都未曾出現過。

飯局尾段，葉劉同田二少相繼早走，記者問史泰祖，驚唔驚兩位正副主席同僚都咁「硬淨」，開會會成日拗撬，本身係醫生嘅史笑指，有時火星撞地球都唔係唔好，從醫學角度，有不滿情緒宣洩出嚟，總好過谷壞身體咁話。史醫生呢段話，真係可圈可點。