中環出更：玉石配旗袍 呂太「源」美演繹
成功男人背後，唔少得一個持家有道嘅賢內助。前晚嘉華集團喺香港會議展覽中心舉辦五十五周年紀念慶祝晚會，嘉華集團主席呂志和同太太一早到場，晚會吸引咗唔少政商巨賈朋友到賀，呂太亦滿場飛招呼賓客。
以玉石首飾配襯香港著名中式服裝品牌Blanc de chine（源）旗袍嘅呂太，獲老闆楊先生親自為佢挑選呢套服裝。呂太謙稱自己只係家庭主婦，其實可以將個家打理得頭頭是道，就已經唔簡單啦。
講番呂太套衫，短外套以短褂嘅線條剪裁作設計靈感，用嚟配襯旗袍可謂適合不過，外套用上綴滿歐洲頂級布商印花全珠片布料，喺燈光之下閃閃生輝，內襯較沉實嘅紫色旗袍，低調之中不失雍容華貴。至於媳婦，亦穿上黑色嘅源旗袍，雖然不及奶奶嘅禮服搶鏡，但係別出心裁嘅不規則剪裁，配襯領及襟斜裁嘅一幅喱士，低調中又添了一分精緻秀氣。