中環出更：黃乾亨廿四孝 唔想囝囝稱王
每次見親「新金王」黃英豪，佢面上都掛滿笑容，尋日佢捐一千萬元畀浸大設立中醫藥講座教授席，新金王話今次係配對捐錢，即係佢捐一千萬，浸大亦會出一千萬。加上佢對中醫藥有感情，平時亦有食開中藥保健食品調理，所以希望借今次捐助，可以幫助將呢種中國傳統醫術進一步推廣到國際。
怕黃英豪樹大招風
新金王自從接手金至尊之後，業績翻幾番，身為爸爸嘅黃乾亨最滿意個仔肯為社會出力，同有顆樂捐之心。黃爸爸早喺一九七一年就已經做東華主席，落力做慈善，依家虎父無犬子，黃爸爸當然飲得杯落。不過對於外界以新金王嚟稱呼黃英豪，黃爸爸就覺得呢個稱號唔係咁好，話始終「稱王稱霸」都會樹敵，容易受到攻擊喎。
黃英豪生得一副baby face，其實佢一共有四個仔女，大女已經大學畢業，細仔明年入大學，尋日全部嚟撐場。原來浸大校董會主席王英偉同黃英豪係親戚，王英偉係黃英豪嘅表姑丈，即係王太係黃乾亨表妹。呢個世界真係細。