中環出更：潮商會90周年開P慶祝
尋晚寒流襲港，氣溫得番攝氏九度，係入冬以來最凍嘅一日。但係一眾城中名人同潮籍人士空群而出，無懼寒風，熱情融入香港潮州商會喺會展舉行嘅開心派對，慶賀商會成立九十周年暨第四十七屆會董就職禮。晚宴筵開一百三十幾圍，約有一千五百人出席，現場人頭湧湧，氣氛熱烈，同外面天寒地凍形成強烈對比。
名人聖誕外遊避寒
聖誕佳節就到，城中名人平時忙到飛起，梗要趁機出外旅遊，享受家庭樂。好似深圳王東海集團老細黃楚標（Bill）咁，佢最近喺深圳成立咗間公務機公司，買咗六架私人飛機，今年聖誕一於搭私人飛機去新加坡玩兩日。
同行除了老婆囡囡之外，梗係唔少得外父、外母。Bill哥出晒名愛屋及烏，經常帶埋外父、外母出外旅遊，呢個女婿認真抵錫。同為家己冷嘅Bill哥老友中策集團主席馬時亨都嚟趁熱鬧，佢一早計劃一家四口去南非玩個痛快，重返呢個十幾年前去過嘅國家。
觀瀾湖球會行政總裁朱鼎健（Ken）都係家己冷，呢晚忙於招呼賓客。佢話依家每周都係聲音兩邊走，奔走於海南及深圳兩個觀瀾湖球會之間，聖誕期間都唔會外遊，一於寓工作於娛樂。阿Ken話，球會雖然扎根內地，但都會搞好多聖誕節目與眾同樂。
蔡志明大宅宴員工
祖籍梅縣嘅裕華國貨第二代余鵬春都喺度，佢哋一家四口聖誕節將去泰國Krabi避寒。佢話呢個旅遊勝地嘅緯度同布吉相同，所以風景一樣咁靚。佢笑言，避寒係假，想避公司嘅電話就真，所以有理冇理都要離開香港，先至有放假嘅感覺。
玩具大王蔡志明都係家己冷，佢同着得靚靚嘅太太蔡李惠莉拍拖前來，蔡志明好開心話畀卓妮聽，佢啱啱收購咗喜運佳錶行嘅控股權，實行將自己收藏靚錶嘅嗜好變成一盤生意。
蔡生一向好錫員工，年年喺九肚山大宅搞聖誕派對與員工同樂，今年仲會送出靚錶畀員工抽獎添。
講番尋晚精彩節目一浪接一浪，最有特色嘅節目首推潮州嘅成人禮舞蹈「出花園」。一眾商會核心骨幹仲以一家人形式揮舞小旗齊齊上台，好似潮屬社團總會創會主席陳偉南同囝囝陳幼南一家、商會副會長張成雄同囝囝張俊勇一家等，寓意薪火相傳，場面好溫馨！
卓妮