投訴：店舖雜物長霸電單車位
大埔鄉事會坊電單車泊位長期被雜物霸佔，警方被指「唔踢唔郁」，有法不執！林先生不時途經上址，發現附近店舖佔用電單車泊位擺放雜物，包括手推車及發泡膠箱，令車主「冇位可泊」。「啲電單車位已經唔夠，仲要畀啲貨長期霸住，警察又唔做嘢，有冇搞錯！」林指上址電單車位充斥貨物，不但為電單車使用者造成不便，更影響環境衞生。
警方發言人表示，於接獲本報查詢時已加派警員巡查，證實有雜物擺放在泊車位，已即時向物主發出警告，其後雜物已被移走。
大埔區區議員余智榮直斥警方處事歎慢板，變相逼市民「違泊」，「警方做嘢真係好唔積極，有咩嘢理由啲警察平日巡邏嗰陣會睇唔到？離晒譜！」
余指警方只向霸佔車位者發出口頭警告而不作檢控，令法例形同虛設，失卻阻嚇作用。