政情：頭暈前仆張學明「起樓」
夥拍民建聯參選新界西進入立法會嘅鄉議局副主席張學明，九月初進行過心臟通波仔手術後，近期已經少咗出席公開活動，尋日佢出席星期三立法會大會，前額位置驚現兩個五蚊銀咁大嘅瘀痕，據聞係由於佢日前突然暈眩，頭向前仆，撞到硬物所致，唔知同佢嘅心臟問題有冇關係。
張學明九月初因嘔吐同頭暈被送入院，發現心臟大動脈血管栓塞，所以要做通波仔手術，事隔三個月，近日又傳出佢身體不適，令人擔心佢嘅健康問題。學明尋日出席立法會會議，額前明顯撞瘀咗一撻，據講係因為幾日前佢突然又感到暈眩，眼前一黑頭向前仆，致令前額掛彩，學明嘅情況已引起建制派高層關注，擔心佢嘅健康問題會影響後年嘅立法會選舉部署。
學明尋日出席會議時，除咗額頭掛彩，其他並無異樣，咁都令人安心啲。我哋尋日想向佢求證額前受傷經過，順便加以問候，惜未聯絡上。