政情：涂謹申懵盛盛遊尼泊爾
聖誕節又到，立法會下星期起就放寒假，一眾議員又可以抖吓氣。啱啱過咗新婚一周年嘅立法會議員涂謹申就預晒時間，聖誕至元旦陪老婆去旅行，為咗老婆開心，仲下放所有選擇權畀老婆決定行程，自己只負責出錢。
阿涂滿心以為，可以去北海道過個浪漫嘅白色聖誕，點知前幾日老婆同佢講已經報咗旅行團去尼泊爾，仲要同一班人一齊去添。
其實已經去過好多地方歎世界嘅阿涂話，對尼泊爾完全係零認識，到依家連當地有乜嘢景點都未知，不過佢話去邊都冇所謂，反而驚唔知嗰邊天氣點，擔心去到會凍死喎！其實尼泊爾冬天嘅單日溫差可以由兩度到廿度都有，阿涂真係要做足準備嘞。
六十年代去過尼泊爾嘅社福界議員張國柱就話，當地嘅古城同廟宇都好有特色，叫阿涂要細心欣賞，仲話尼泊爾同西藏只係一山之隔，叫冇回鄉證嘅阿涂可以試吓去遠眺祖國，一償回鄉願。