政情：廖成利辭黨主席唔再陪跑
近期政黨核心人物頻頻鬧「離婚」，除咗田北辰同方國珊退出自由黨外，外號「老虎仔」嘅民協主席廖成利退下火線傳聞亦不絕於耳。原來老虎仔已在上周六黨會員大會上正式提出辭去黨主席一職，表面上用意係專心打理律師樓及為黨培訓政治人才，但傳聞話佢已厭倦再為馮檢基參選立法會陪跑，而導火線則是他早前提出與民主黨合併，遭黨友大潑冷水，堂堂黨主席冇晒面。
老虎仔辭去黨主席職務後，會一併放棄所有議會選舉，包括明年嘅九龍城啟德區議員連任及二○一二年立法會選舉。主席一職暫時由黨副主席、深水埗區議會副主席譚國僑署任，直到明年底新一屆區議會選出後才改選黨領導層。
區會交棒畀新人
至於老虎仔嘅啟德選區議席，現在已經交棒畀新人楊振宇接手參選。不過，民協理應到明年底才正式換屆，老虎仔喺中途急於辭去黨主席職務，可見係佢嘅不滿大爆發。
老虎仔於八三年同馮檢基一齊創辦民協，並當選黃大仙橫頭磡新區區議員，九五年更當上立法局議員，登上從政生涯嘅最高峰，可惜無法當上長勝將軍，自九八年臨時立法會任期完結後，近三屆立法會九龍西直選只能排在阿基之後陪跑，無法進身立法會。有接近民協消息話，阿基多年來參選依靠老虎仔嘅律師專業形象，以彌補私樓中產票源不足，可惜四年又四年，老虎仔看不到前景，惟有研究與民主黨合併期望殺出新血路。
親白鴿遭潑冷水
不過，老虎仔錯估形勢，未有諮詢黨員意見前私自提出與民主黨合併，仲接受電視台訪問暢談合併事宜，結果遭黨友大潑冷水，除咗馮檢基強烈否認合併外，就連譚國僑都話未有計劃討論，更有黨員表示感到失望，等於狠狠向老虎仔連橫摑幾巴掌。消息話，老虎仔為事件感到意興闌珊，與其陪跑，倒不如放棄參選，順勢辭去主席職務，專注發展律師行業務。
民協正全力爭取喺明年區選翻身，阿基會由老巢麗閣選區轉戰李鄭屋選區，擊退因為「穿櫃桶底」而入獄嘅前民協議員官世亮，奪回議席，加上港府計劃削減委任議席，屆時民協極有可能重奪區議會主席及主導權，有利運用區議會資源，為下屆立法會選舉鋪路。據悉，阿基會在一二年改循超級區議會議席出選，譚國僑則參選九龍西直選，期望突破一個議席嘅宿命，不過經歷老虎仔劈炮巨變，如意算盤都唔知打唔打得響嘞。