中環耳目：羅開揚激讚吉列黑豚扒
食肆老闆為自己舖頭省招牌好正常，但大快活集團主席羅開揚（Dennis）就瞓晒身力撐旗下品牌，一星期食足十餐大快活。早前大快活集團公布業績，Dennis一見到卓妮，又推介大快活美食，自稱好鍾意去大快活開餐，好似早前大快活開咗三間分店，因而要經常巡舖坐鎮，於是順便喺店內開餐，一星期內就食足十餐，破晒紀錄。
大快活一系列快餐之中，Dennis最愛厚切吉列黑豚扒大碗飯配日式磨菇牛肉汁及日式咖喱汁，佢話以每客卅二元價錢就食到值外間百幾元嘅質素，咁平靚正嘅嘢去邊到食喎。
食落夠脆又鬆軟
佢話呢個飯嘅特別之處，係採用優質靚豚肉，配上日本麵包糠，經過一百六十度高溫處理，能夠鎖住肉汁，食落爆脆同鬆軟，用平靚正形容相當貼切。
Dennis賣花讚花香，秋冬時令嘅煲仔飯一樣咁正，佢最鍾意係滑雞及臘腸煲仔飯，配上特製豉油真係無得頂，天氣凍食完暖笠笠，售價同樣係卅二元，認真超值。
卓妮