中環出更：「泰國通」陳有慶 食飯有自家品牌
辛亥革命一百周年前夕，掀起一片孫中山熱。中環大會堂尋日舉行紀念辛亥革命一百周年大型展覽，吸引城中政商界名人出席。革命先驅後人都嚟湊熱鬧，除咗孫中山曾姪孫孫必達，仲有曾與孫中山一起倡言革命嘅「四大寇」尤列的曾孫尤迪桓，即係前民政事務局常秘尤曾家麗嘅老公。
大會展出八幅孫中山手筆，吸引大家爭相睇珍品，二百幾人逼喺展廳內，都咪話唔墟冚。前全國人大常委曾憲梓坐住輪椅嚟到，大家讓路畀佢睇展覽。
台上更熱鬧，全國人大常委范徐麗泰、中總會長蔡冠深、牛仔褲大王楊釗、「零食天王」戴德豐、中總榮譽會長霍震寰等都有份主禮，粒粒巨星。席間話題離不開傾吓民間疾苦。
泰國米明年率先加價，港人要捱貴米，卓妮捉住有「泰國通」之稱嘅全國僑聯副主席陳有慶問個究竟，一問之下，原來陳家唔止係泰國望族兼銀行世家，仲係泰國米大批發商。陳有慶自爆五十年代已經營泰國米生意，但佢退休多時，生意交畀新抱打理，大家行去超市，依然買到佢自家品牌嘅泰國米喎。
講起加價，陳有慶話，泰銖比去年同期升值百分之三十，加上水災減產，加價在所難免，佢聽聞越南米有意以平價進軍香港市場，邊隻好食啲，佢賣花讚花香：「梗係泰國米香啲。」
陳永棋遊亞馬遜
卓妮轉頭見到全國政協常委陳永棋，佢預告今晚坐飛機去神秘嘅亞馬遜河過火辣辣聖誕，同行仲有太太及姨甥。首次遊亞馬遜河，最恨見吓印第安人同影吓野生動物。卓妮問佢驚唔驚畀食人䱽咬，棋哥就話，䱽魚未見蹤影，已被機票費咬咗一啖，淨計機票錢，每位要六位數字，六個人出發，條數幾襟計。
卓妮