笑看天下:鬍鬚曾主修戲劇

鬍鬚曾上鏡上了癮,上次神龍見首不見尾咁閃嚟閃去:「我會考慮一下!」畀網民惡搞成《曾俊華‧回魂夜》;今次佢老哥突出撇鬚,一點春心蕩到死咁話:「留意見唔一定要留鬚嘅!」主次不分,老朽以為佢轉行拍《大軍閥之炮火豪情》,睇怕佢大學係主修戲劇,副修娛樂,年年愛上鏡,則我哋年年有永不落幕的荒誕劇可賞,派唔到糖得啖笑,都算功德無量。

鬍鬚曾嘅網誌又係一絕,你睇唔到有何壓抑通脹嘅措施,也睇唔到利民紓困嘅大計,反而睇到佢猛咁緬懷昔日的日子,回憶點心妹推出來的熱辣辣蝦餃有幾正,勾起老朽往日與點心妹阿珍的「榕樹下之戀」。唉!舊事不堪記,最衰鬍鬚曾又無端端吹皺一池春水。

鬍鬚曾新作《如果你是我……》首尾呼應,氣聚丹田的開門見山噴射而出:「如果你係我,你會點制訂下年度嘅財政預算案呢?」嘩!乜咁睇得起我哋呢啲升斗蟻民啊!如果我係你,就唔使住冇定所,憂死後搵個骨灰龕都難。所以話,不如把題目改作《如果你有我份人工……》嘻!咁老朽就會「宏觀調控」地留言:咁好日子,生活無憂,老朽晨曦練詠春,黃昏習擊劍,華燈初上,約昔日點心妹上米芝蓮推介之六星級酒店,品紅酒鋸牛扒!

鬍鬚曾上年要記者幫佢諗幫助「三無人士」嘅方法,今年要人角色扮演,唔參與好似唔畀面,參與「留意見唔一定要留鬚」遊戲,如果太認真,自己唔覺得傻,都好似多少有點兒腦退化。

其實,講嚟講去,都係派現金最實惠!