政情：梁栢賢轉行做藝人？
十一月中先上任醫管局行政總裁嘅梁栢賢（ＰＹ），知名度愈來愈高，出街都有唔少市民認得佢，不過最近就搞出一個笑話。話說ＰＹ有朝早出街，撞見一對賣旗嘅母子，媽媽見ＰＹ就同個仔講，「呢個叔叔好熟面口喎！」但就叫唔出ＰＹ個名，媽媽竟然指住ＰＹ同囝囝講，「佢梗係藝人嚟嘞，叫藝人叔叔喇！」ＰＹ啼笑皆非，但都照畀錢買旗。
其實ＰＹ都唔係第一次畀人認錯，○三年沙士爆發時，任衞生署副署長嘅ＰＹ，久唔久就同當時醫管局嘅專業事務及人力資源總監高永文公開亮相解釋疫情。有次ＰＹ戴住個口罩去超級市場，排隊畀錢時，前面個市民竟然大叫佢做高永文，仲話「你係高永文，戴咗口罩我都認得你！」
ＰＹ做咗行政總裁後忙到飛起，不過佢都好安慰，皆因佢第一次主持嘅員工大會，出席員工多到成個禮堂都唔夠坐，比以前坐得一半人多成倍，反映員工對佢有期望。