政情：雷曼苦主認錯孫公二撇雞
雷曼事件擾攘兩年都未解決，一班苦主日日抗議，早就變成示威達人。不過尋日兩個苦主趁行會開會請願時，竟然將教育局局長孫明揚當錯做財政司司長鬍鬚曾曾俊華。我哋問番苦主，佢話見到孫公有兩撇鬚，好自然咁當咗佢係鬍鬚曾喎！鬍鬚曾啱啱推出嘅財政預算案諮詢宣傳片，又係叫市民黐撇鬚就扮財爺講意見，唔知兩個苦主係咪受此影響。
鬍鬚曾特登唔接信
話說兩個苦主尋日準備咗三封信，預咗畀政務司司長唐英年、鬍鬚曾同財經事務及庫務局局長陳家強，希望佢哋可以跟進未解決嘅雷曼賠償問題。不過三個人未到，孫公咁啱經過示威區，兩名苦主向住佢大叫：「曾生，雷曼事件未解決呀！」孫公唔係曾生，所以冇回應就行過咗，而喺另一邊停車場落車嘅鬍鬚曾同陳家強就聽到苦主嘅抗議都唔去接信。而唐唐收信仲竟然反問：「乜仲（雷曼事件）未解決咩？」睇嚟苦主應該認清楚鬍鬚曾個樣，下星期再嚟過請願。