政情：吳方笑薇打荷包唔容易
綠色環保風大吹，工業家都愈來愈重視環保，香港青年工業家協會前晚喺會展舉行新一屆就職晚宴，專登撥出一角畀地球之友募捐，地球之友中國事務委員會主席吳方笑薇（Mei）更坐鎮捐款箱前，但要打人荷包主意唔易，坐咗半粒鐘依然未發市。
王敏剛帶頭捐錢
晚宴嘉賓多達二百幾人，Mei靜靜地同職員坐埋一角「看檔」。眼見賓客魚貫入場，始終冇人肯高抬貴手做善事，直至協會榮譽顧問王敏剛出現，一馬當先捐出一百元人仔，廠商會副會長羅富昌更豪，捐夠五百元，副會長李秀恒等人亦加入響應。
終於「開齋」，Mei笑逐顏開，話籌到幾多事小，宣揚環保訊息事大，佢仲呼籲大家改變送花籃嘅文化，改以捐款方式做賀禮，更有建設性喎。
Mei嘅善行，新任香港青年工業家協會會長何志佳都大表支持。佢話，工業發展過程中，難免對周遭環境造成污染，呼籲工業家搵錢之餘，咪忘記支持環保。