政情：梁家騮怪招爭標準工時
今年可謂商界議員嘅多事之秋，啱啱先拆掂最低工資，轉個頭港府又密鑼緊鼓推標準工時，驚死佢哋未拆夠政治炸彈。面對殺傷力極大嘅標準工時，唔少商界議員雖然想反對，但又唔敢明刀明槍反對，以免再做箭靶畀社會炮轟佢哋無良心。向來力撐標準工時立法嘅醫學界代表議員「怪醫」梁家騮，日前忽然獻「怪招」，建議將標準工時先訂喺高啲嘅水平，聲言咁做可包保商界「落疊」，亦令佢哋唔使再做醜人喎。
商界喺最低工資一役中輸得慘烈，勞工界企硬三十三蚊，但商界卻「寧死不屈」，自由黨飲食界代表張宇人更因太老實為選民發聲而鬧出「廿蚊張」風波，拖累埋個黨民望大瀉，其他功能組別嘅議員亦難以獨善其身。吸取經驗，痛定思痛，面對標準工時立法，商界議員雖然好想反對，但同時都努力搵緊下台階，避免再被冠以「無良商家」嘅稱號。
怪醫喺議會內外早已多次叫港府正視現時醫生「有返工無放工」嘅問題，當然想標準工時盡快立法。面對勞工界現時同商界傾唔掂數嘅情況，怪醫話，港府制訂第一次嘅工時水平時，可以唔使訂喺勞工界提倡嘅每星期四十四個鐘，而中間落墨訂喺較高水平，好似五十幾個鐘咁，相信可以將對商家嘅影響減至最低，對商界背景嘅政黨嚟講亦係可以接受嘅水平。
50個鐘 增連任籌碼
眾所周知，現時喺醫院工作嘅醫生工時極長，閒閒哋一星期要返成六十幾七十個鐘，所以即使將標準工時訂喺五十個鐘，對醫生們已係「皇恩浩蕩」，怪醫亦足以向佢嘅選民交代，為下屆連任增添籌碼。政治問題其實係講數嘅藝術，四十四、五十、七十邊個數最安全，要好小心處理。
講開連任，怪醫直言仲未決定是否再選，笑稱自己對政治冇乜興趣，係對醫療政策關心多啲，佢自言好安於繼續做立法會五散人嘅其中一人，認為散修修就好，冇需要進一步團結起嚟。