中環出更：縱橫遊兄妹班接棒
繼康泰旅行社由太子爺黃進達接掌旅行社業務後，以營辦日本團起家、有三十多年歷史嘅縱橫遊亦部署由第二代兄妹班接棒。太子爺袁振寧（CN）及太子女袁愷瑩（Jessica）昨日首次與傳媒茶敍，佢哋率先宣布喜訊，就係縱橫遊獲日本東北七縣指定為香港區的合作夥伴，確立了旅行社在日本經營多年的江湖地位。
CN主要負責公司內部事務，妹妹Jessica則係公司嘅業務拓展經理，主要對外。Jessica係靚女一名，喺倫敦修讀心理學，學成後從事保險業，近一年先返旅行社打理業務。Jessica與時下年輕人一樣喜愛旅遊，尤其鍾愛日本文化同飲食，對北海道更情有獨鍾，今個聖誕佢就會去北海道玩。
CN都係半個日本通，佢介紹咗一間喺札幌狸小路嘅居酒屋畀記者，佢話間食肆內部裝修好特別，以木為主，提供數款自助小食，但無標價，老闆視乎客人拿取嘅分量收費，連飲啤酒兩人消費萬多日圓，都好抵喎。
卓妮