回收雜物霸路食署扮盲
行人路淪為回收場，食物環境衞生署被轟執法不力。荃灣楊屋道有回收店長期佔用行人路堆放雜物，不時途經上址的江小姐不滿部門視而不見，「條行人路擺滿紙皮、車仔同回收籠，有時仲用埋後巷嚟擺嘢，搞到條街污糟晒！」
荃灣區區議員陳恒鑌直指店舖阻街衍生環境不潔及阻塞行人通道等問題，食環署責無旁貸，「對一啲長期改善唔到嘅違規店舖，食環署就應該同其他部門傾多啲，例如告得密啲，咁先有阻嚇力！」陳又建議當局長遠應考慮在上址設置禁區，以杜絕違規行為。
食環署發言人指出，近期已經跟相關部門展開聯合行動檢控回收店負責人，並會繼續留意上址情況及採取行動。