政情：蘇菲講古 瞓身撐發叔
立法會尋日討論行政會議成員劉皇發漏報利益單嘢，泛民主派空群而出鬧爆特區政府，唯獨與發叔同屬經濟動力嘅蘇菲梁劉柔芬力撐佢，仲連發叔嘅媽媽都搬埋出嚟，認真唔話得。
作為議員個人利益監察委員會主席嘅蘇菲梁，上個月議監會討論發叔單嘢時，佢已經放棄主持會議，以示公允，只係唔避席啫。尋日佢再度訂下君子協定，講明雖然同發叔交情非常深，但一定會秉公說話；若然有人覺得佢偏私，大可以直斥其非。
不過戲肉在後頭。蘇菲梁繼續講，話佢聽過新界鄉親講，發叔媽媽好鍾意坐喺屋企門口嘅大笪地曬太陽，有時有啲村民經過，會提議發叔媽媽買起佢哋幅地，等村民有錢周轉，所以難怪發叔唔知原來有啲新界地係自己嘅。蘇菲梁仲話，發叔嘅人格係點大家有目共睹，當初政府委任佢入行會時，大家都好似無乜微言，所以大家都係向前看啦。蘇菲梁瞓晒身撐發叔，唔怪得政制及內地事務局局長林瑞麟都無話可說啦！