政情：陳智思選標 預咗成身箭
爭奪中環荷李活道前已婚警察宿舍活化計劃塵埃落定，政府尋日公布投標結果，活化歷史建築諮詢委員會主席陳智思（Bernard）出嚟開記者會，交代遴選過程細節，眼前一幕，令人勾起去年初北九龍裁判法院活化項目（下稱「北九」）爭逐戰一役，當時八和會館投標落選，激發八和主席汪明荃同Bernard隔空過招。
警察宿舍活化項目有四個單位競逐，撇除跑出嘅同心教育文化慈善基金，其他係信和旗下非牟利機構、黃英琦同胡恩威領軍嘅香港當代文化中心同一個內地基金。我哋問過Bernard，怕唔怕今次重演北九風波？Bernard一派「出得嚟行，預咗要還」嘅氣慨，話做好晒心理準備，預咗今次可能又會畀人射到成身箭。佢話無計啦，每次活化項目招標，總會有人唔中標，落選者總係覺得唔公平，所以有人不滿好正常，無人鬧佢至出奇喎。估唔到Bernard咁有阿Ｑ精神，唔通呢個就係做「公職王」嘅秘技？