政情：鬍鬚曾國金講話惹人猜想
財政司司長曾俊華尋日喺香港按揭證券公司董事會會議之後見傳媒，需知佢老闆煲呔曾早幾日突然話會喺冇預告情況下打壓投機炒賣，鬍鬚曾尋日身份係署理行政長官，大家一心以為佢會公布類似嘅措施，點知只係公布咗中小企融資計劃。
鬍鬚曾尋日揀喺國金中心大堂公布消息，唔好睇小呢個地點，以往金融市場有乜風吹草動，前金管局總裁任志剛都會喺呢度同記者講幾句，不過自從新總裁陳德霖去年十月上任後，已經冇咗呢個習慣，至今只係用呢個方式見咗記者一次咁大把，就係月初美國公布ＱＥ２嘅時候。儘管如此，國金中心大堂依然令人難忘。
唔知有心定無意，鬍鬚曾尋日又喺國金中心大堂見記者，連接近政府消息人士都估計，今次會講關於「按揭」嘅嘢，加上又係喺按揭證券公司董事會會議之後，令人更加相信會公布敏感消息。不過原來關於樓市嘅部分只係有「我哋會密切留意，有需要時會推出適當措施」呢兩句，真係多謝晒！