政情：申亞拉埋十大基建 曾德成亂嚟
港府早前將申辦亞運嘅成本減至六十億，有人擔心港府同今屆投資咗逾千億搞亞運嘅廣州相比，只能搞個寒酸亞運，失禮街坊。
尋日民政事務局局長曾德成自行解畫，但係竟然將十大基建嘅開支同亞運開支掛鈎，話今次廣州亞運總共用咗九成開支搞基建，本港未來同樣會投放逾千億喺十大基建度，大家不相伯仲，唔會被比下去，呢種講法都近乎狡辯。
香港青年聯會尋日搞咗個地區諮詢會，聽取年輕人對申亞嘅意見。除咗有德成局長繼續死撐外，主辦單位香港青聯主席陳仲尼亦力撐申亞，話港人唔應該只從成本角度出發，忽視亞運可為本港帶來嘅機遇。曾經勇奪第九屆全運會單車賽金牌嘅何兆麟，都猛話搞亞運有助推動運動精英化，可藉此提高運動員水平。
雖然大會今次話明要聽取年輕人意見，但台上嘉賓發言佔去咗一小時，發問時間得半小時，學生最終只得兩人有機會發問，仲有學生悶到喺度釣魚。